ᑐᓴᕋᑦᓴᓕᕆᔩᑦ
ᐃᓕᑕᕆᔭᐅᖁᔭᐅᔪᑦ ᐃᓄᐃᑦ ᐅᑭᐅᖅᑕᖅᑐᒥ ᓴᐳᔾᔨᓯᒪᓂᖏᓐᓄᑦ
Released | August 17, 2009 | No Comments | 
Print this article
(ᐊᐅᒡᒍᓯ 17, 2009 — ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᓯᕗᓕᖅ ᐊᖓᔪᖅᑳᑉ ᑐᖏᓕᖓ ᔭᐃᒥᓯ ᐃᑦᑐᓗᒃ, ᐅᓪᓗᒥ ᑐᑦᓯᕋᖅᑲᐅᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᓕᑕᕆᔭᐅᖁᔨᓪᓗᓂ ᑐᑦᑕᕐᕕᒋᔭᖓᓐᓂᒃ ᐃᓄᐃᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ.
“ᐃᓄᐃᑦ ᓄᓇᖃᕆᐊᓐᖓᖅᓯᒪᔪᑦ ᐅᑭᐅᖅᑕᖅᑐᒥ. ᑕᒫᓂ ᓄᓇᖃᓐᖏᒃᑯᑦᑕ, ᑲᓇᑕᐅᑉ ᓴᐃᒻᒪᑎᖓᓂᒃ ᐋᖅᑭᑦᑕᐅᓯᒪᔪᖃᕋᔭᓐᖏᑦᑐᖅ ᐅᑭᐅᖅᑕᖅᑐᒥ ᐅᓪᓗᒥ”, ᐃᑦᑐᓗᒃ ᐅᖃᖅᑐᖅ. “ᐃᓄᐃᑦ ᑕᒪᐅᓐᖓᕈᑕᐅᓯᒪᔪᑦ ᖃᓪᓗᓈᑦ ᓄᓇᖓᓐᓃᓐᖔᖅᑐᓄᑦ,” ᐅᖃᒃᑲᓐᓂᖅᓱᓂ.
“ᓂᐅᕕᖅᑏᑦ, ᐸᓖᒃᓯᑯᑦ, ᐃᓕᓐᓂᐊᑎᑦᓯᔩᑦ, ᒐᕙᒪᒃᑯᓐᓂ ᐊᖓᔪᖅᑲᐅᑏᑦ – ᑕᒪᐅᓐᖓᖅᓯᒪᔪᑦ ᑕᒫᓃᓐᓂᑎᓐᓄᑦ. ᑕᐃᒪᐃᓕᖓᓪᓚᕆᑦᑐᖅ, ᑕᐃᒫᒃ ᑲᓇᑕ ᓴᖅᑮᓯᒪᕗᖅ ᑕᕝᕙᐅᓂᕐᒥᓂᒃ ᐅᑭᐅᖅᑕᖅᑐᒥ.”
ᐅᖃᒃᑲᓐᓂᖅᓱᓂᓗ ᒫᓐᓇ ᐊᑦᓱᕉᑕᐅᔪᒥᒃ ᐅᓇᓕᑦᓴᐃᑦ ᓇᔫᑎᓂᖓᓐᓂᒃ ᖄᖐᓐᓇᕆᒋᐊᖏᓪᓗ ᐱᐅᓯᐅᓯᒪᓪᓚᕆᑦᑐᒥᒃ, ᑭᓯᐊᓂ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒻᒪᕆᒃ ᐃᓕᑕᖅᓯᓂᖃᖅᑐᖅ “ᐃᑲᔪᖅᓯᓂᐅᓯᒪᔪᑦ ᑲᓇᑕᐅᑉ ᐊᑑᑦᓯᒪᔭᖏᓐᓄᑦ, ᖃᓄᐃᑦᑑᓂᖓᓄᑦ ᐊᒻᒪᓗ ᓴᐳᔾᔨᓯᒪᓂᖓᓄᑦ ᐅᑭᐅᖅᑕᖅᑐᒥᒃ.”
ᐃᑦᑐᓗᒃ ᐅᖃᕆᐊᒃᑲᓐᓂᖅᑐᖅ ᑕᐃᒪᐃᓐᓂᖓᓄᑦ ᐊᑐᓕᖅᑎᑕᐅᓂᖓᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒻᒪᕆᐅᑉ ᐱᒻᒪᕆᐹᓘᕗᖅ ᐃᓄᓐᓄᑦ ᐊᒻᒪᓗ ᑲᓇᑕᒧᑦ. “ᑲᑐᔾᔨᖃᑎᒌᒍᑎᒋᒋᐊᓕᕗᑦ ᓯᕗᓂᕐᒧᑦ,” ᐅᖃᖅᑐᖅ. “ᑭᓯᐊᓂ ᐳᐃᒍᖅᑕᐅᓯᒪᓪᓗᑕ ᐊᐃᑉᐸᐃᕆᔭᐅᒐᔪᑦᑑᔮᖅᑐᒍᑦ, ᐅᕝᕙᓘᓐᓃᖅᑲᐃ ᐊᓚᒃᑲᐅᒪᓐᖏᑦᑐᑦ ᐊᐃᑉᐸᐃᕆᔭᐃᑦ.”
ᐃᑦᑐᓗᒃ ᐅᖃᖅᑐᖅ ᒐᕙᒪᑐᖃᒃᑯᑦ ᐱᕈᖅᐸᓪᓕᐊᒋᐊᖃᕐᒪᑕ ᖃᑭᒪᓇᓱᐊᕐᓂᖅᑎᒍᑦ ᓴᓐᖏᔪᒥᒃ ᐅᑭᐅᖅᑕᖅᑐᒥᒃ, ᐊᑦᓱᐃᑦᑐᓂᒃ ᓄᓇᓕᖁᑎᖃᕐᓗᑎᒃ. ᒫᓐᓇ ᐃᓄᐃᑦ ᓵᓐᖓᑦᓯᕙᒻᒪᑕ ᐋᓐᓂᐊᖅᑐᓕᕆᓂᕐᒥᒃ, ᐃᓕᓐᓂᐊᕐᓂᕐᒥᒃ, ᐊᒻᒪᓗ ᐃᓅᓯᕐᒧᑦ ᖃᓄᐃᓕᖓᓂᐅᔪᓂᒃ ᐊᑲᕐᕆᓇᓐᖏᑦᑑᔪᒥᒃ ᑕᑯᓐᓇᖅᓱᒋᑦ ᐊᓯᖏᑦ ᑲᓇᑕᒥᐅᑕᐃᑦ ᐃᓅᓯᕆᒐᔪᑉᐸᑦᑕᖏᑦ.
“ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᐊᑐᓕᖅᑎᑕᐅᑦᓯᐊᕆᐊᓕᒃ ᐊᑕᖏᖅᑐᒥᒃ ᐊᓯᔾᔨᕐᓂᖅᑕᖃᕐᓂᐊᖅᐸᑦ ᓄᓇᓕᑦᑎᓐᓂ,” ᔭᐃᒥᓯ ᐅᖃᒃᑲᓐᓂᖅᑐᖅ.
ᑐᑭᓯᒋᐊᒃᑲᓐᓂᕐᕕᑦᓴᖅ:
ᕗᕌᖕᑯ ᕗᓴᒥ
ᐊᐅᓚᑦᓯᔨ, ᑐᓴᐅᒪᔪᓕᕆᔨᒃᑯᑦ
| ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ |
| 867 975 4939 |
| 867 222 1411 |
| ᐊᑭᖃᙱᑦᑐᖅ: 1-888-646-0006 |
fbuscemi |
NR 09-13 SOV INUK Inuit Sovereignty.pdf